粉紅色頭的是 NOISE，板齡一年；黃黑色中分髮型的 TOMI，踩板大半年；中長髮的 TERRY 玩了一年半；而 SKIN-HEAD 的徐仔板齡最長，4年。這 4 位同住在葵青區的模特兒並不是在片場認識，而是在青衣東北公園的板場上結緣。他們各有所長：徐仔滑板技術最佳，年紀亦最輕卻最成熟，是個可造之材；NOISE 的時尚觸角和菱角有致的臉孔最近深受時裝廣告商歡迎；而 TERRY 和 TOMI 充滿美學細胞，熱愛拍攝及平面創作，4 子聯同另外幾位 HOMIES （滑板友人），自發組成了一個名為 ＠8AKA8AKA （讀音為 バカバカ）的小型團隊，一起紀錄和創作有關時尚和滑板的影像，是一群 Z 世代的 FASHION SKATERS。
在 Instagram 查看這則貼文
NOISE
NOISE 接觸人生首個模特兒工作便是 ADIDAS 的廣告邀請，那年十八不在母校舞會，而是在台灣收到一生首個邀請，全無經驗的他懷疑過是否有詐，「當時其實好驚㗎，佢哋仲話畀埋機票錢我返香港，諗過喺咪呃人，之後諗諗下又覺得自己爛命一條，就飛返去了。」NOISE 就是個貪玩膽大的人，連他也自覺是個「大細路」，初到板場便膽粗粗去請教「地膽」徐仔，敢想敢做的真性情讓他交情處處。
一件黑色 SUPREME CNN THE WAR REPORT TEE 配 VANS 全黑 SKATE CLASSICS SK8-HI 和少量銀飾，NOISE 認為飾物可賦予他力量，而選擇高筒鞋，原來是因為早幾個月前曾因踩板受傷，差點就錯過了重要的高級時裝拍攝工作。
/ 我叫 NOISE ，21歲，依家全職 MODEL。 /
在 Instagram 查看這則貼文
# 什麼時候開始玩板？為什麼開始接觸？
上年七月開始踩，我有個小學同學見佢玩得好癲就覺得好有型，咁我就叫佢帶我去買咗人生第一塊滑板，之後因為疫情所以冇踩到，直到七月我頂唔住先至開始正式踩！
＃你們是怎樣認識大家的？平時工作活動很多時侯也與滑板有關嗎？
一開始係滑板場自己練，之後走過去問徐仔可唔可以教我 OLLIE。就係咁樣認識咗，大家都住得好近，所以都會經常見！另外依家開始慢慢好多拍攝都想加滑板元素入去，每次去 SHOOTING 佢哋都叫我帶定滑板。
＃最常去的板場？
最經常去嘅都係屋企附近嘅東北公園，因為近同埋方便，而且場地非常適合任何階段嘅人踩！
＃不同坡道的板場有何分別？踩街同踩板場又有什麼分別？
踩街可能你要反應能力和判斷能力要好快，同埋基本功一定要好穩陣！因為你會遇到好多你預計唔到嘅地理環境！同埋街上面啲路好爛又多石仔，所以啲人踩街可能會換返踩街轆。踩板場嘅話就會相對容易玩同安全，因為如果你經常踩同一個地方嘅話就會熟悉左佢哋個場地，咁就容易玩。
＃踩板前通常有什麼活動？
我踩滑板之前就會係屋企一定要完成咗每日嘅目標300下掌上壓先出門口。因為呢個係我做MODEL對自己的要求。
# 為何會喜歡上滑板？
覺得好爽好自由！呢種運動因為真係好有型，佢嗰種魅力我都唔識點講，真係好沉迷令到我日日都想去踩。
＃有沒有關於滑板的難忘經歷？
最特別嘅經歷就係12月嘅時候我大拗柴，十字韌帶傷晒，輕微骨裂，完全行唔到路。原本我接咗LV SHOOTING，受咗傷之後就有少少想放棄推咗佢！之後我有個朋友鼓勵我，講咗一句說話：「我係X教授，都照樣企起身去影！」之後我就叫醫生比晒繃帶止痛藥上陣，最後都堅持完成拍攝，因為我要做 HONG KONG TOP MODEL，所以我願意堅持忍痛！
後來有陰影，差啲想放棄滑板，但係我又心諗橫掂我都受過傷，唔爭在喇，就用咗一個月時間去克服！每次做動作嘅時候我都好驚，但係我話俾自己聽我做到嘅！之後我不停練習Ollie，由基本功重新再嚟過！
＃所謂的「板仔精神」是怎樣？
我哋個個都有呢種精神面貌，因為無懼一切，願意去挑戰嘗試。因為我哋還年輕！想做就去做，跌倒受咗傷再嚟過，我哋有嘅係時間。
＃又覺得香港現在的滑板文化風氣怎樣？
我覺得依家踩滑板嘅人越來越多，但係都仲係有好多人都唔了解踩滑板，佢哋可能淨係覺得我哋係街童，四圍破壞。
＃滑板運動為你們的生活帶來怎樣的改變？或者滑板體驗為你人生帶來怎樣的啟發？
我以前係一個遇到少少困難就好容易放棄嘅人，就係滑板令我學識咗堅持！無跌過幾多次受過幾多次傷我都願意企返起身再試，去挑戰每一個可能性。一塊板四個碌兩個 TRUCK 就對我成個人改變好大，我會用返呢種態度擺返喺日常生活工作，堅持唔好放棄。
CHUI CHAI
一頭乾淨俐落 SKIN HEAD、赤裸的上身，忽然一條花俏又趣怪的紅黑色頸鏈在他頸上特別搶眼，徐仔除了是 @8aka8aka 的一份子，亦與女友設立了一個飾物品牌，名字也搞笑過人，叫做「返緊來 （ @farngunlai ）」，裡面賣的配飾都頗具 NEW AGE 和龐克氣息。17 歲的徐仔是個非常有個性的高中生，4年前就開始踩板，除了擁有偏鋒的審美觀外，其攝人的氣場、成熟的談吐，也讓人難以想像他在學校與同輩相處的模式。
每次炫技後都會對著目定口呆的攝影師說「踩板就係咁㗎啦！」，徐仔面對鏡頭毫不生澀，有著恰度好處的自信和態度，原來他首次的模特兒工作亦是由板友 NOISE 介紹的，「嚟到板場識到啱 CHANNEL 的朋友其實好開心。」和 NOISE 同樣有「無懼一切」精神的徐仔當日為了配合拍攝而不慎滑倒，腹部被刷出幾道傷痕：「踩板就係咁㗎啦！」在旁的11歲板仔小Q卻說徐仔甚少傷成這樣。
/ 大家平時都叫我徐仔，今年17歲，仲係讀緊中學。/
在 Instagram 查看這則貼文
# 什麼時候開始玩板？為什麼開始接觸？
大概4年前開始踩滑板，因為細個突然有朋友玩，我又覺得幾型所以求其買咗塊滑板開始玩，玩耐之後發現同其他運動好唔同，便愛上了滑板。
＃可以為我們介紹一下不同板場有何分別嗎？踩街同踩板場又有什麼分別？
每個板場都有佢唔同嘅特色，踩街挑戰性就多啲，因為好多嘢都預測唔到，要好迅速嘅反應，而踩滑板場就好似當練習咁。
＃踩板前後，通常有什麼活動？
我踩板前通常都會買啲嘢食嘢飲，踩板之後通常就會同朋友一齊坐低傾偈或者去踩街。
# 為何會喜歡上這種運動？
因為滑板比我一種好自由嘅感覺，只要我身邊有塊板無論在任何地方我都可以踩，唔受任何限制，這就是滑板最吸引我嘅地方。
＃有沒有關於滑板的難忘經歷？
滑板帶比我好多嘢，有次 NOISE 問我想唔想影相，我就話OK啊，但係影咩啊，佢就話影滑板嘢，幫雜誌影，嗰一日真係好難忘好開心。
＃所謂「板仔精神」又是怎樣？
講到板仔精神，我最 RESPECT 嘅係 YULONG。
＃又覺得香港現在的滑板文化風氣怎樣？
我認為，在香港滑板文化仲係好難被大眾接受，好多人都認為板仔都係一啲唔讀書，唔返工嘅廢青，而且在香港踩板冇咩實質嘅幫助保障我哋呢班板仔。
＃滑板運動為你們的生活帶來怎樣的改變或啟發？
平時就算唔開心或者開心都會去踩板，踩板很減壓，踩板時咩煩惱都冇晒，而踩板對我最大啟發就係好多嘢都唔係一時間可以達成，好多成就都要慢慢累積。
＃可以形容一下平時踩板時的穿著風格嗎？
我平時踩板鍾意簡單乾淨再加啲 PUNK 嘅元素。
＃LV 甚至邀請了知名滑手 LUCIEN CLARKE 簽約，而 EVAN MOCK 也是 RUNWAY 寵兒，你對這些時裝界的滑手偶像有什麼看法？
我覺得有 SKATER 可以同 LV 簽約係一件好夢幻嘅事情，通常我哋聽到 LV 呢個牌子就會聯想起奢侈品，但係如果可以再加滑板嘅元素落去，我覺得成件事好不可思議。
＃今期主題是 ESCAPE，你認為滑板對於你而言有沒有一種「逃脫」的解放感？
滑板對於我哋講有一種好強烈逃脫嘅感覺，喺香港呢個節奏好快嘅城市，我覺得踩板就好似淨係享受踩板嘅過程，唔使理其他嘢。
＃有關滑板運動的一個短期目標？
拍攝一個大約1分鐘全程都係踩板嘅影片，剩係得我一個 SKATER。
TERRY
白色背心配一頭中長髮，TERRY 的外型讓我聯想到舊年代的日本少年，黃昏見面之時，他躺於板場中心的平台上，其中一隻鞋的鞋帶鬆綁，亂擱一旁，打招呼時語速慵懶，滑板技術在板場上算不上風頭躉，但逍遙自在的氣質反倒有另一番風味。
TERRY 有細膩的觸覺，能提起他興趣的話題之一是攝影，他問我手上菲林去哪兒沖曬；問拍片的器材用什麼型號，問深一層才知道他平日鍾意觀察、鍾意街拍，回到板場上，亦是板仔們的攝影師之一，最喜歡一邊踩板，一邊紀錄友人的新 TRICKS，個性不慍不火，人緣倒是不錯。
/ 我叫 TERRY 阮俊傑，今年20歲，我是學生。/
# 什麼時候開始玩板？為什麼開始接觸？
從2020年年頭開始踩板，經朋友介紹下開始踩的。
＃最常去的板場和時間？自己選擇這個板場的原因？
最常去青衣板場，通常在傍晚的時候落板場，因為我住青衣，青衣板場較近，方便去，另外朋友都通常在青衣板場踩，這是個老少咸宜的場。
＃踩板前後，通常有什麼活動？
踩板前會約好朋友一起，一齊去買水，再入板場，踩板後就會一起去附近的夜市買些小食，食完才回家。
# 滑板能讓你快樂的原因是什麼？
當初我試玩時學習的速度比較快，便迷上了，成功做到新 TRICKS 的成就感很好，喜歡這運動的原因是它具挑戰性，後來許多認識的朋友都會踩板，變成一個圈子。其實同朋友一起踩板能帶給我喜悅感，大家會有唔同崗位，例如徐仔試新 TRICKS，我同 TOMI 就鍾意拍攝。
＃有沒有關於滑板的難忘經歷？
唔多，但試過跳樓梯拗柴。
＃在你認識的板仔朋友中，你有沒有看到一種相似的「板仔精神」？
有，流曬血都繼續踩。
＃又覺得香港現在的滑板文化風氣怎樣？
越來越多人踩板是好事，但多數為踩而踩，非真心喜歡而踩。
＃滑板運動為你們的生活帶來怎樣的改變或啟發？
擴闊了社交圈子，識多了朋友，都係更加夠膽挑戰，唔放棄的精神。
＃可介紹一下現時擁有最喜歡的滑板及鞋子嗎？
ADIDAS SUPER STAR
＃現時很多高級品牌如 LV、CELINE、PRADA 也注入滑板、衝浪運動等青年文化元素，你有什麼看法？
可以睇得出滑板運動變得全球化，亦越來越多人關注呢種運動。
＃今期主題是 ESCAPE，你認為滑板對於你而言有沒有一種「逃脫」的解放感？
有，踩板時嘅感覺係係令你可以拋開一切，只專注於踩板。
＃目前，有關滑板運動的一個短期目標是什麼？
希望盡快出條屬於自己嘅滑板片。
＃疫情過後會希望去那個國家嘗試踩板？
英國。
# 一句關於對於自己未來的期望？
希望可以成為香港獨當一面嘅 SKATER。
TOMI
品牌加入滑板元素，有的是因為想將衣服打入青年市場，迎合滑板愛好者的需求；有時是想將滑板帶入時裝，希望提升街頭文化的勢力，無論如何，服裝無可否認地具有文化傳播的能力，TOMI 就是其中一個例子，說到最初接觸滑板的原因，原來是因為 FUCKING AWESOME 和 SUPREME 等品牌的文化符號讓他著迷。
比起其他板仔，TOMI 相對斯文內斂。他在四年前飛到英國讀書，卻因為疫情爆發而暫時休學回港，賽翁失馬，焉之非福，疫情讓他遇上了滑板和一班朋友，亦展開了一個有趣的「隔離假期」，相信即使他日 TOMI 回到英國，這段時光亦會是個難忘的章節。
／ 我依家20歲，係一名學生，係英國讀平面設計。疫情嘅關係上年嘅三月返咗嚟香港，直到而家。／
# 是怎樣開始接觸滑板的？
我由上年嘅 11 月左右開始踩滑板，原因係一開始自己對滑板就好有興趣，加上自己好鍾意滑板牌子出的衣物，但我覺得如果唔識踩板又咁樣着會好奇怪，所以就開始學踩滑板。
＃你們是怎樣認識大家的？平時工作活動很多時侯也與滑板有關嗎？
我係喺青衣滑板場識大家，嗰陣仲學緊點樣踩，然後佢哋走過嚟教我，之後就認識咗。後來接觸的拍攝活動有好多都同滑板有關。
＃最常去的板場和時間？
最常去都喺東北滑板場，通常都係夜晚去，因為夜晚會比較熱鬧，同埋自己係住係葵青區會方便點。
＃可以為我們介紹一下不同坡道的板場有何分別嗎？踩街同踩板場又有什麼分別？
坡道比較多嘅板場比較難掌握，新手玩亦比較吃力。而踩街同踩板嘅分別，就係在於踩街考驗嘅嘢多好多，例如要顧及反應、地形，同埋途人。
＃踩板後通常有什麼活動？
踩板後通常都會同其他板仔食吓嘢、傾吓計。
# 滑板讓你快樂的原因是什麼？
因為我覺得滑板可以放低煩惱，有種自由嘅感覺。同埋滑板對我來講係一種生活，帶了好多朋友同回憶畀我。
＃關於滑板的難忘經歷？
成隊 CREW 一齊踩街影嘢。
＃覺得香港現在的滑板文化風氣怎樣？
喺大眾嘅眼中覺得板仔只係一班街童，因為香港人嘅思想比較保守。我哋係佢哋眼中係一班周圍破壞規矩嘅人，但其實我哋只係一班勇於做自己嘅年輕人。
＃滑板運動為你們的生活帶來怎樣的改變或啟發？
原本自己只係一個平平凡凡嘅學生，但自從接觸左滑板之後，令到我學識活在當下，做一啲自己想做嘅嘢，唔好被大眾嘅想法去框住自己、影響自己。
＃可以形容一下平時踩板時的穿著風格嗎？
我比較鍾意着鬆身衫方便郁動，顏色就全黑，因為踩板好易跌，會整污糟。
＃可介紹一下現時擁有最喜歡的滑板及鞋子嗎？
我最鍾意嘅滑板牌子係 WELCOME SKATEBOARDS 佢哋嘅圖案好吸引我，鞋方面就係 VANS SLIP ON，因為懶綁鞋帶，同埋踩滑板好易會磨斷鞋帶。
＃滑手 EVAN MOCK 是不少時裝品牌的寵兒，你對這些時裝界的滑手偶像有什麼看法？
我相信咁樣喺對板仔嘅一種肯定，因為滑板呢個運動係來自街頭，板仔得到大牌子嘅簽約絕對係一件好事，同埋自己本身都鍾意 EVAN MOCK，因為覺得佢嘅髮型好特別，技術都好勁。
＃今期主題是 ESCAPE，你認為滑板對於你而言有沒有一種「逃脫」的解放感？
我認為滑板同呢個主題好貼切，特別係香港 一個充滿着壓力嘅地方，當踩上滑板就有一種放低煩惱嘅感覺，喺街上面不斷踩，就好似從壓力中逃脫咁。
＃疫情過後會希望去那個國家嘗試踩板嗎？
想去英國踩，因為自己係英國讀咗幾年書，一直見好多板仔踩街，但未返香港之前一直未接觸呢樣運動。另外英國嘅滑板風氣幾好，喺嗰邊踩板應該會幾開心。
RELATED ARTICLES:
Comments