我與 CdG 的第一次專訪：Gary Chung 與玲姐的初邂逅

當筆者開始着手為Comme des Garçons（CdG）專題做資料搜集，首要任務就是希望找到玲姐與香港的微妙聯繫，以便令專題更能植根本土。多得Google大神，發現主線曾在1995年時在香港拍攝平面廣告。而幸運中選的其中一位廣告主角，就是星級化妝師Gary Chung。得知後馬上發出訪問邀請，慶幸身為時裝精的Gary亦相當興奮，非常樂意回憶中選過程與周邊故事。另一方面，原來他也是個資深玲姐迷，年中買不少Comme des Garçons出品；更發現Gary第一次遇見CdG，是在於文華東方的Joyce Boutique舊址。相信當年許多時裝精，第一件CdG都是進貢給獨具慧眼、首位將CdG引入香港的Ms. Joyce Ma吧。不知這個訪問，能否勾起你的半點CdG少年情懷？

我與Comme des Garçons的第一次

Ming’s：你與CdG是一見鍾情嗎？第一件吸引你的CdG是？

Gary Chung：當年第一次遇見CdG，是在文華東方酒店內的Joyce Boutique。當時被一件男裝Homme Plus白恤衫所吸引，雖然白色看來平平無奇，但恤衫巧妙地在衫鈕下工夫，衫鈕有大有細、鈕與鈕之間疏密不一，相當有趣。雖然當時未有錢買，但就因為這件恤衫令我對CdG一見鐘情，久未能忘。

Ming’s：還記得第一次購買的那件CdG嗎？

Gary Chung：剛踏入社會工作，儲夠錢就馬上去Joyce Boutique買人生第一件CdG！但當時Joyce都已經搬離文華東方酒店，落戶中環Galleria。第一件買嘅CdG係Homme Plus嘅短袖深紫色恤衫，衫腳有蛇皮拼布，大約港幣二千蚊，當時好多人買！

Ming’s：第一次穿上CdG的感覺是？

Gary Chung：第一次着CdG真係好興奮，因為之前只會係雜誌見到，或者只係經過Joyce摸一摸已經好滿足，邊有諗過自己會着住一件幾千蚊嘅CdG。當時着上CdG Homme Plus時，覺得自己同玲姐好親近，好夾好似好朋友咁。其實直至現時都仲有keep件衫，雖然已經着到又霉又爛，假蛇皮變成一粒粒粉狀甩出嚟，但都用三文治袋收好珍藏。

Ming’s：是甚麼讓你成為CdG信徒？

Gary Chung：因為CdG非常原創，唔會只係sell你一件只係睇落好靚嘅衫。靚嘅定義我覺得係當期流行，而CdG唔係好理個Trend，只會專心做自己設計，所以成品好原創好獨一無二。

Ming’s：如果時光倒流讓你買回一件過季設計…

Gary Chung：最想買第一次係文華東方一見鍾情件白色恤衫！

Ming’s：你有見過玲姐（川久保玲）嗎？第一次見她的真人有甚麼感覺？

Gary Chung：其實多年前曾經係中環Galleria Joyce見過佢巡邏業務！佢都係唔笑、好Cool、好有型，如果可以同佢講一句我會問佢肯唔肯影Selfie，但我知佢唔會睬我，因為佢咁cool係唔會影Selfie，哈哈！！

（編按：實在太過份！行行吓街撞到玲姐機會率低過中六合彩！）

Ming’s：你最深刻的一個系列是？

Gary Chung：玲姐1981年首個登上巴黎天橋嘅系列！當時從未出現過類似設計，又穿洞又麻包袋，無咩shape形狀又古古怪怪。當時好多人都覺得好奇怪、好肉酸，但現在好多設計師都抄佢，所以我覺得佢第一個系列係最爆！

Comme des Garcons廣告拍攝回憶

Ming’s：當時是怎麼知道CdG在香港casting？

Gary Chung：當時我仲讀緊演藝學院，好多朋友係理工大學或是其他設計學校就讀，同學就話CdG來港casting，見我咁迷CdG就叫我去試，咁我就儘管去試試！

Ming’s：好多時裝精都好想知 … 究竟你係點中獎？

Gary Chung：其實我有出少少古惑，哈哈！！當時其實我已經有做part-time model，不過因為我自己知CdG唔鍾意太model嘅模特兒，當日去到casting係一班日本人面前叫我影相，咁我就專登唔擺好model嘅pose，扮到好唔識擺pose好似傻仔咁，咁樣就中咗獎，哈哈哈！！！

Ming’s：拍攝過程難忘嗎？

Gary Chung：當時我唔覺得佢哋拍緊廣告，反而似係做緊藝術品多啲，係香港街頭走來走去影相。最特別係當時唔係畀我着男裝，而係要我着女裝，仲記得最後揀咗一件紅色see-through裙畀我，我覺得好特別，可能真係一生人唯一一次着到玲姐女裝，而且效果都好有型。如果着男裝仲無咁深刻，着上女裝當刻就覺得果然係CdG出品。當時仲要化妝Set頭，素顏上陣，因為佢地鍾意raw啲嘅感覺，係一次奇妙體驗。

Ming’s：仍有收藏廣告內頁？

Gary Chung：當時好想keep返個廣告，但CdG無特別話寄返畀我。但咁啱演藝學院有學生Show去歐洲，經過巴黎CdG shop見到自己張海報，掛到全間舖都係，當時好興奮！shop入面店員認得係我，就好好送咗啲海報同名信片畀我，一直收藏到而家啦！