鮑起靜、方平：有可為有可不為 〡Unexpected Fashion Couple

時裝不應該有賞味期限的。只要當事人歡喜，不論什何年齡性別，合該都能分享打扮的樂趣。東京巴黎紐約倫敦，周街見銀髮潮。

多謝鮑姐和方平叔接受邀請傾力演出。 「我地兩個玩從未諗過可以咁玩。」

時尚，是屬於所有有心人的。

旁白：二人各自換好衫，準備埋位。

方生：發花癲過嚟喇！

鮑姐：好靚呀！未見過自己咁靚（自顧對鏡陶醉）。你話自己着西裝好睇，我唔覺喎！記得我哋第一次見，佢得17歲，成日一副書卷打扮，恤衫斜褲，我好鍾意，再加一對黃色Clarks皮鞋。

方生：唔係黃色，係啡色！

鮑姐：好青春。

方生：17歲仲唔青春？唔係71呀！

鮑姐：我對佢來講比較難（評論），好似從未讓佢覺得我靚過！

方生：佢個人比較樸素、太樸素，對於服裝要求，唉！我唔講，你自己講。

鮑姐：佢成日批評我『乜都有得救，taste冇得救』。

方生：自己鍾意咪得囉！人只會擔心自己愈來愈老，唔會擔心愈來愈後生，可以扮靚就打扮一下，why not？我對佢沒要求。

鮑姐：我真係咁差？外面好多人都讚我靚，點解你覺得我醜？

方生：啲人呃你之嘛！

鮑姐：咁我真係唔夠佢有眼光，屋企我得一間
房有衣櫃，佢有兩間房擺滿衫！我家婆
講過『你個人又亂糟糟又唔靚又唔貪靚，
點解佢娶你？因為你人好、有犧牲精神。』呢個就係我個優點，永遠將佢放第一位，我真係唔識照顧自己，好慶幸 嫁俾佢，才沒後顧之憂。

方生：兩夫妻講乜都得，一定唔可以人生攻擊，呢個係尊重。

旁白：拿出各式時裝照片供二人品評。

方生：潮流興「阿爸款波鞋」我屋企大把！舒服又靚，波鞋襯西裝不知幾有型。依家好多時裝，太後生太潮，我哋未必跟得上，但靚嘢就人人都鍾意睇。我真係咁大個人第一次塗指甲油！

鮑姐：我哋老了，爹哋！好多地方都脫節。依家做演員，乜都要玩下，我好鍾意玩 live，即時分享，好直接，朋友都叫我自己寫 blog，但我好懶；佢呢！最近才 學玩facebook咋！

方生：個女幫我開之嘛！我唔想俾人知咁多嘢，亦唔想講咁多嘢！私底下，我愛閒時寫下感想，分析一下電影賣座的因素之類，但唔會發表，費事人哋睇完反問：『你好叻咩？觀眾受咪得囉！』我個人知道自己做緊乜，有可為有可不為啦！自己亦有堅持，你話我傻又好乜都好； 我成日講，依家電影愈大愈風流，幾大製作的片子，全都只係CG，但一套戲，人更加緊要。

鮑姐：前一排你終於忍唔住寫咗篇文post上 facebook！

方生：真係忍唔住，寫咗篇文讚揚韓國電影《與神同行》。人哋講地獄，我哋講地獄，中國片淨係識拍牛頭馬面，得人驚嘛！人哋一樣有大量CG，不過，包裝靚，畫面乾淨，基本功夫做到足，拍到好感人，十分值得我哋去學習。

鮑姐：佢開facebook只係想睇下親戚朋友的新動作，真係好少發表己見，今次算罕見。

方生：好似人哋window shopping，齋睇就夠。