趙啟嵐、楊鎧凝：每個人都可以搵到自己叻的地方〡Unexpected Fashion Icons

做得「星」，付出最大代價便是自主自由，何況童星！年紀小小乘着最大天賦，戲裏不離戲外。趙啟嵐（Matt）和楊鎧凝（Celine）一個8歲一個10歲，骨子裏透出老練與得體，教旁人啼笑皆非，當事人倒也自得其樂。

自香港電影金像獎之後，二人來拍攝硬照，飾演三對大人物，時裝教父教母Karl Lagerfeld和川久保玲，藝術巨人畢加索和草間彌生，音樂永恆約翰連儂和小野洋子，Celine還多分飾文學才女張愛玲一角。時尚放在他們身上，原來可以這麼精彩。

開工當日，星期日由中午拍到晚飯之後，二人一個呵欠也沒有，一句怨言也沒有，一次扭計也沒有，除了十分十分十分乖巧，我已不知道還可以說什麼了。

Matt：我知什麼是才華，即是有人打鼓叻，有人唱歌叻，有人整衣服叻，我的才華就是做老闆（工作人員要Matt扮老闆上鏡接受訪問），做時裝老闆！

（手托眼鏡帶點高傲表情）
Celine：才華即是⋯⋯我最叻？譬如拍戲、影相囉！跳芭蕾舞都得。全世界沒分最叻最唔叻，每個人都可以搵自己最叻的地方，一個跳舞叻，一個彈琴叻，個個都平等，沒分彼此。

Matt：我好鍾意韓國男子組合BTS（防彈少年團），其中隊長Red Monster、Jung Kook和阿V，三個人有方面幾搞笑，有方面又好正經，好有才華；好驚自己講唔清楚，形容得太好，搞到大家會羨慕佢哋！其實，我都有少少想去韓國旅行，我只去過兩次旅行，次次都要拍嘢，想去韓國睇「防彈少年團」演唱會，我鍾意韓食，荃灣有間韓食店，第一次食就鍾意喇！又想去日本，有爆旋陀螺玩⋯⋯

Celine：噢！爆旋陀螺⋯⋯呵呵呵！我有睇爆旋陀螺卡通片，《百變小櫻》或《美少女戰士》都鍾意。我都鍾意去旅行，探遊世界，看看別人的環境啦！空氣啦！任我揀一個地方⋯⋯揀兩個得唔得？上次大阪玩過山車，架車一坐上去就升起，嘭嘭嘭係咁轉，細佬玩完又想再玩，唉！泰國都好，可以游水，好正。

旁白：平時返學又要拍戲，沒時間看卡通吧？

Celine：我7點起身返學，3點半放學，有課外活動就4點半囉！我參加基督少年軍、英語音樂劇、普通話小組，之後要補習，中英數常。拍戲都要返學，星期六、日拍囉！放學拍都得，拍到7、8點。

Matt：我不用補習。平時不用返學不用拍戲，我會睇電視⋯⋯驚講出來你哋會笑我⋯⋯朋友介紹我睇《小馬寶莉》，幾好睇⋯⋯仲要溫默書！有時，我去同學仔屋企玩，自己屋企呢，除咗親人和阿叔之外，一個人都沒上過來。

Celine：我怎樣放鬆自己？返到屋企先沖涼，污糟嘛！睇電視，溫下書，自己做功課，我有自律的精神。

Matt：我都有自律精神，作為班長，我一定會先做好功課，才可以服務別人。

旁白：你喜歡服務別人，如果你是美國總統，會做什麼？

Matt：我都算有點領導天份，到時我會講下法律問題，怎樣領導？按自己有能力去領導美國呀、英國呀所有人囉！做一個總統定要領導所有國家，這就是我覺得最偉大的事情。

旁白：做總統去到邊都被人認出，沒自由，你自由一點，是嗎？

Matt：我都被人認得，若果唔認得，我都唔會唔開心，其實，我去街只要做少少嘢（唱歌跳舞），次次就有人問「小朋友，點解你咁靚仔？點解你唱歌咁叻？」

Celine：學校同學個個都識我，更有主動跟我say hello，全部都是朋友囉！我又未試過被人認錯是另一個Celine（《全美一叮》的Celine Tam），認錯都唔緊要，大家個名一樣嘛！