有錢，不一定代表有品味，君不見多少fashion victim，身上一件單品隨時貴過你同我一個月人工？
化妝一樣如是，筆者就見過身邊不少女生或美妝blogger「曬冷」件件名牌化妝品，但化出來個妝卻總有一種說不出的cheap cheap地的廉價感，但又有些模特兒、女星或素人，五官不是特別標緻，卻有種「個樣好貴」的感覺？今次我們請來了曾跟班無數雜誌、廣告合作過的星級化妝師Lauren Lee，拆解令你妝容秒速變俗氣的3個伏區！
星級化妝師
Lauren Lee
伏區 1 ：太多珠光閃粉
不少女生碰上婚禮、約會又或者annual dinner等等隆重一點的場合，直覺上覺得妝容應該要閃一點，眼影閃、highlight閃、胭脂加多少少珠光閃埋佢！靚唔靚見仁見智，但卻極易變成大媽登台或夜場辣妹妝！
Lauren解答：閃粉可以用，但要識用在局部小範圍，單塗一堆閃粉，就會顯得廉價！技巧是用在matte面上，舉例來說：單塗上一片閃粉珠光眼影，妝容好容易顯得廉價，雙眼亦容易顯得浮腫！若先用matte面眼影打底，再將閃粉式珠光眼影用少少在眼窩、或眼頭位，眼妝反而更立體自然。
伏區 2 ：大眼仔 +植眼睫毛
絕大女生都有嫌自己雙眼不夠大、眼神不夠閃亮的self-doubt 時刻（筆者每日起身時都有如斯感覺呀！）近年不少女生索性植眼睫毛+戴大眼仔就出門去，聽落的確好方便，但原來令你靈氣盡失（除非你真心鐘情cosplay）！
Lauren解答：每次化雜誌妝時，最怕見到model戴大眼仔和植眼睫毛，載了大眼仔後離遠看眼睛好像大了，但近看卻會像洋娃娃無靈魂，其實用眼影和眼線加深返眼部輪廓，一樣有放大眼型又能keep住精靈眼神。
植睫毛實在方便，但好講求美睫師的技術，因每個人眼型不同，若植得太密太翹，反而顯得壓眼令眼型下垂，一般所見大部分女仔植完眼睫毛後眼形變得大同小異，如果你想有自己的獨特性，建議好好夾睫毛、塗睫毛膏，再按眼型修剪好假眼睫毛黏上。
伏區 3：全面「令立立」
雖然cushion水光粉底的確好方便，highlight打亮又好醒神，塗完唇彩個嘴好似plump up飽滿，但全部加埋原來會好cheap……
Lauren解答：充滿光澤感的底妝無問題，但當唇彩加highlight都一齊令立立都會太over，水光底妝襯返啞色唇；或是啞緻底妝拼上亮澤飽滿的唇彩，你的樣子即時會有一種高級感！
Comments