第36屇香港電影金像獎昨日發佈官方特刊照片，一如以往有每年《Vanity Fair》為奧斯卡入圍演員拍攝的封面合照奢華味，今年主題玩復古，男女主角全部清一色着褲裝晚禮服，其實整個氛圍沒大問題，出事就出在三位女主角們的腰封。照片中最Sharp醒有型的必定係惠英紅小姐，你可能會話佢位處最中間，但另一個原因係佢完全Carry到套衫，白色企領將焦點放上紅姐臉部輪廓更突出，褲腳與高跟鞋留白距離剛剛好，最重要係佢無個腰封拖佢後腳，造型非常俐落。
反觀鮑姐、湯唯、馬思純就係衰在腰封，令佢地唔夠高佻、腰短嘅東方身材比例顯得更短。褲裝要着得好最緊要係要望落乾淨、瀟灑，人裝合一，但照片上的她們看來非常硬直。其實腰封意在於將修腰，令男士肚腩唔會一層層透過白恤衫暴露人前，做到腰部修長視覺效果。但因為男人上身線條比較方正，亦無女性胸部會墜前嘅先天性問題，修腰後亦無需要變成漏斗身型，所以一般無女性束衣般嘅立體剪裁。但對於女士，用上粗腰封後望落條腰會完全消失，再加上胸部向前墜，視覺上更加臃腫。而且三位女主角身穿的腰封仲要有橫紋，腰線拉得更加橫，絕對唔係好嘅示範。講到最完美的女性西裝晚禮服當然要數YSL的吸煙裝，中性之外又因修身剪裁充滿女性魅力，簡單加條幼Belt已經有返條腰線靚好多。
Comments