有權有勢有女人味！跟Christine Lagarde學法式剛柔並重權力着裝

自Hilary Clinton上年參選美國總統開始，權力着裝（Power Dressing）成為熱潮話題，再加上近期女權主義越炒越熱，連Net-a-Porter最新公佈的來季秋冬潮流預報，亦指Power Dressing將成為不容忽視潮流。墊肩西裝外套、優雅強勢褲裝將會繼續成為熱潮，但要完全駕馭權力着裝非常考功夫，尤其不少人都怕一套Pant Suit太強勢而可避則避。但其實只要好似福布斯全球女性權力排行榜排行第六、現任國際貨幣基金組織總裁的Christine Lagarde，完美拿捏剛柔並重法式穿搭，使她更成為《Vogue》常客，亦曾登上《Vanity Fair》Best Dress list，證明權力着裝都可以柔美中見女人味。
 

1. 絲巾戲法

絲巾可以話係法國國寶級配飾，揀啱一條色調優雅真絲好貨，整身造形馬上添上幾分柔情。權力着裝大多衣物線條比較硬實，Christine Lagarde出名以絲巾配上行政套裝，不但柔化整套造形，更起點綴作用而不失莊重。Christine除咗日常愛用Hermes絲巾簡單披搭，筆者特別欣賞佢選用風琴式百摺絲巾，高手不做多餘事，只需要打個簡單平結，或當成寬鬆Neck Tie，有權有勢都可以有女人味。
 

2. Chanel Chanel Chanel!

Power Dressing當然要講行政套裝，但揀普通食之無味套裝定Chanel Tweed套裝，就係高手與低手分別。Christine Lagarde毫無懸念地係Chanel迷，亦曾在《Vogue》透露畢生最愛Chanel，只要有Chanel，世上沒有事是解決不了的。一件完全Fit身粉紅外套盡顯佢嘅時裝功力，保守中帶冒險精神，加上一對珍珠耳環、花白銀髮，直頭有一陣皇室味，高貴又優雅。另一套白色黑邊Tweed外套，外披黑色頸巾，柔和中帶鐵娘子霸氣。就算要揀黑色挺身外套，加個簡單山茶花線條胸針，同樣化解剎氣，散發高貴氣質。

3. 非典型Pant Suit

一般行政褲裝都予人沉悶乏味感覺，似係無咩可塑性，但近年興起寬腳褲，如果有膽絕對可以好似Christine Lagarde襯上一條輕柔Trendy寬腳褲。白色西裝外套配上一條絲質闊褲，絕對係突破心房大冒險，either the best or the worst，配上一對白色高跟鞋令全身造形更輕盈，實在令人眼前一亮。如果功力未及，復古格仔今年亦非常流行，不妨一試。