第一世界煩惱！
我要選擇的是：A. 一個無嘢做喺香港的星期日，還是B. 一個無嘢做喺巴黎的星期日？
如果你明白我愁什麼的話，至少也是個老巴黎吧。
若問「Paris 星期日最佳的節目是什麼？」，真心用腦諗已經即刻肥佬，會答「無」「係無嘅」「根本死城一個係完全無節目嘅」都只得 90 分，爆燈的真正時裝精購物狂，基本上一聽到呢條題已瞬間崩潰泣不成聲！
星期一在巴黎出差一天，星期二一早便得離開法國，但之前那個星期日倒是閒着的， 所以才考慮良久，寧願留在香港過一模一樣的 Sunday，還是早一天抵達花都享受十室九關的 Dimanche ？
上文動用「崩潰」，並非誇大，因為我真的在星期日的巴黎 nervous breakdown 過！ 去慣男裝周的人都知，整個活動歷時五天，由周三到周日（以前只得四至日四天）頭四日是店舖正常營業的，偏偏日程排得密麻麻有時一日要看八場騷朝九晚十一，你整天在車上穿梭巴黎，望遍各大名店門口卻「蜑家雞見水唔飲得」，喂，唔鍾意 fashion 嘅人就唔會去 fashion week 啦，但職責在身近在咫尺卻無時間 shopping，都算時裝十大酷刑之首，最恐怖是終於捱到星期日，又夾定一樣幾乎人人唔 揀這天做 show，你明明守到渴望已久的巴黎半天假，頂你個肺卻全城休息……（下刪一 萬字粗口）好吧，你心想，用來還之前幾天積埋積埋、幾乎為睇 show 猝死的睡眠債，星期日瞓番晏啲都好吖，偏偏有個不幸的多年傳統―兩大品牌食硬了 Sunday 一早一夜的 「大分瓶」梗局，早上十一點是 Lanvin 男裝的例番，傍晚七八點通常被 Hedi Slimane 霸住壓軸，如果Hedi不上班，Thom Browne 也是周日黃昏的常客，總之一定有人吼實這個 finale 位，你咪使旨意瞓晏啲，街又無得行，連好的餐廳很多這天都不做生意，你唔好諗住趁大把時間無 X 聊約人去食個特長 Brunch kill time ！
周日巴黎之今時與往日
這句話聽起來有點涼薄，但其實滿載購物狂的血與淚：多得經濟不景！那個因為民族性懶散，sorry，改說「很會享受生活」吧，加上工會過分保障工人，所以一部通書睇足幾十年，「不准強迫法國人禮拜日開工」的堅持，近年終於輕輕「跪低」了，當然是在金錢面前，否則底子不算勤力又抗拒靈活變通的法國人，一定會覺得「接受改變等於承認錯誤」，無得傾！
以前，你想星期日有少少街可逛，要撞 正法定大減價開始的首個 Sunday，才有些店會一年兩度的破例營業。直到 2017 今年，生意終於壞到老佛爺、春天、Le Bon Marché 三大龍頭百貨店要攜手周日加班了，事實上 Avenue Montaigne 和 Rue Saint Honoré 兩片名牌聖域今年開始都嘗試 363 日（除了聖誕新年）燈火通明，喂，又係嘅，連最elegant 最唔 care 的大家姐 Chanel 都決定番足七日工， 你哋唔係話唔跟吓話？
訪問相熟巴黎售貨員的感想，想知法蘭西人民他他條條嘆了幾百年，突然這樣，同事間歡迎的多還是埋怨的多，她兜兜轉轉講了半天，我猜她最想學的廣東諺語是「馬死落地行」吧，而且平時一周工作五天的 salesperson，如果肯在上帝指定的安息日捱義氣，將獲得一星期只工作四 day，星期日變相雙倍人工。「雖然不是最正斗最？飯應的安排，但至少是 fair 的！」她說。
到底你等唔等錢使呢？
唯一唔慣的可能只是顧客，是的，由於做好了research，知道現在巴黎好多店都 open on Sunday，所以我還是提早一天去法國了，基本上大部分想逛的店都有開，反而目測一些平時人頭湧湧的店舖都出奇地略見冷清，大概是因為客人們都不知道巴黎人現在突然勤力到年中無休（咁滯），星期日明明在花都，都不知道有 ping 可以 shop， 怕摸門釘，就試都不試了。可能需要一些時間的口耳相傳，星期日照常營業才能真正產生相應的經濟效益吧？
話說回來，大家因為「想賺多啲錢」 才「開埋禮拜日」吧？所以店舖的措施都應該以「拉客」而不是「趕客」為前提吧？ 偏偏有些店的 policy 還是會令我覺得「搞咩呀你」的，比如時時有奇怪新聞傳出的 Lafayette，星期日開 11am至 7pm ！好吧， 如果你想多做遊客生意，你的退稅部門應該開到幾點？計我話至少「遲關半小時」開到七點半，讓客人即使真的買到七點還有 30 分鐘可以排隊拿回那個其實對大家都如命根一 般重要的 Tax Refund 吧？那麼你猜他們的退稅櫃台幾點關門？你甫進去百貨公司，喇叭便大聲廣播，叫你六點半好去 claim 錢，逾時不候無情講喎！哈哈背道而馳地「遲關半小時」，真係正！
Comments