左：城城婚禮當日出晒事，右：日常出席活動又正常喎
由第一眼睇到個新郎襟花開始，筆者已經周身唔聚財，半島婚禮、伴郎團勁，理應型男索女無得輸，點解世界上咁多款新郎襟花，偏偏城城要揀中個全世界最老土嘅 The One，點解就係要揀大日子先嚟出事，筆者真係接受唔到啊！其實西裝揀得都算求其，作為一套結婚禮服，無 Waist Coat、無 Cummerband 腰封、外套個開襟 Deep 到落肚臍，粒鈕又尷尷尬尬、西裝尾唔修身無 Cutting；加上唔知點解揀個好似美少女戰士咁嘅紅檔檔大煲呔，我當城城求個意頭都算，個小牡丹襟花真係老土到突破宇宙重圍！城城啊，你去金像獎都唔會咁着啦，平時又好少犯錯，點解結婚大日子先出事喎！
首先，小牡丹襟花代表作一定係《教父》馬龍白蘭度去呀女婚禮時一套正確穿搭：幼身黑領呔、內加一件 Waist Coat，襟花位放係西裝外套領口左胸扣位之上，而唔係領口隔離。一朵鮮紅玫瑰不加任何裝飾就已經夠剎食，夠浪漫又唔會太矯情。城城首先犯下好多香港新郎犯嘅錯，襟花唔係擺係領口扣位；其次，有咩理由揀橙紅咁俗豔劍蘭咁嘅色，要喜慶都應該揀暗藍調玫瑰紅；第三，點解要有鐵線草圈圈襯底呢（？！）；第四，襟花襯煲呔一樣色，真係老土到一個點！
雖然黃曉明與 Angelababy 婚禮風聲太大，無人放眼衣着，但曉明當日打扮可謂正宗新郎襟花示範作，簡簡單單白色咪幾好；另外要睇靚西裝，英國紳士男神 Benedict Cumberbatch 喺《Sherlock》中擔任老友證婚人穿搭，襟花加袋巾就更加係完美模範，城城雖然大家都好高興見到你成家立室，但套新郎戰衣，真係完全 Fail。雖然今次真係有啲失望，但我哋會等你靚靚仔仔返嚟報仇！
Comments