陸俊彥人稱俊仔，和不少板仔一樣，最初踏上滑板的原因都只是覺得有型，誰料這位當時事事都三分鐘熱度的13歲小男生，一踩便踩到現在，更獲 VANS 多年贊助，由沙田踩出國際，腳毛遍佈世界各地街頭與板場。上網翻看有關於俊仔的訪問，除了有多次奪金的彪炳戰績外，記者都為他冠以「香港滑板界一哥」、「OG」的頭銜。俊仔的名字在香港滑板界無人不知。
俊仔今年34歲，是個充滿活力又真誠的運動員，皮膚黝黑，笑起來牙齒整齊又潔白，是我認識的板仔中形象最健康的一位，我好奇他是否因為運動員身份而刻意維持形象，他就說：「其實除了任何犯法的事，我都很開放去嘗試。但你話我係咪因為運動員身份而唔紋身，其實唔係，只係因為我好驚刺痛，哈哈哈！我都想紋㗎！」誰說一個職業滑手一定是個天不怕地不怕的鋼鐵人？他也有他的可愛。
俊仔是唯一一個擁有 VANS 個人合作鞋款的香港滑手，他當時特意在鞋底上設計了「靚仔無罪」的玩味 SLOGAN，字體彷效小巴水牌上的毛筆楷體字，極富港味，一推出便在亞洲地區火速售罊。他常常說自己擁有的一切有趣體驗都是滑板帶給他的，「有人問我如果以後無得踩板，會有咩遺憾，我唔係留戀自己有幾勁，而係會好掛住呢種生活，可能出 TOUR 睇到好多唔同嘅生活，學習唔同嘅事物。」俊仔珍惜現在擁有的一切，如今的他，亦想回饋香港的滑板圈。
／俊仔：大家好！我係俊仔啊！13歲開始踩滑板，依家係一位職業嘅滑板仔。／
在 Instagram 查看這則貼文
＃最常去的板場？選擇這個板場的原因？
美孚，因為已經係奧運級的滑板場，好好玩，我自己好鍾意去。
＃可以介紹一下你的個人品牌 KURVWORLDWIDE 嗎？創立的原因是什麼？
我嘅品牌就叫 KURV，推出咗三年左右，純粹係一個滑板品牌，會出一啲衫褲，但最主要都係賣滑板為主。當初係朋友叫我一齊搞，因為細個嗰時無錢買滑板都好需要其他人支持，依家自己想做返呢個角色。雖然賣滑板其實好難賺到錢，但至少我可以自己話到事，有機會可以送板畀其他有潛質嘅板仔，當係回饋一下呢個圈子都好。
我自己好鍾意閃閃嘅設計，所以 KURV 好多貼紙同板底都係用幻光物料設計，之前曾經同 NASA 同 ANICORN 三方聯乘的嘅板亦都好鍾意，成個板底都係反光的銀色塗層，都係好快就售罄。
# 滑板能給你快樂的原因是什麼？
我成日形容踩板就好似開 PARTY，佢係無限制嘅，有人去板場 CHILL，有人去練習，有人去見下朋友，我覺得最緊要就係開心。
＃有沒有關於滑板的難忘經歷？
其實講來講去都會係嗰件事，哈哈，就是喺澳門一個比賽上完成唔到自己想做嘅 TRICKS 而喊。踩板嘅人咁在意比賽係會被人笑㗎，但當時我唔係因為自己輸而喊，而係對自己好失望。記得當時有個分數牌螢幕，鏡頭會捕捉參賽者嘅狀態，有成 5 分鐘都影住我喊，勁樣衰。但呢件事令自己成長好多，好難忘，之後都無咁在意比賽了，其實就算自己贏咗都好，只係幸運，亦唔會太追求榮譽感，因為板仔可以靠拍 VIDEO 去證明自己。
＃「板仔精神」是種怎樣的精神面貌？
堅持，我覺得大家都會好想做自己，唔想成為其他人，同埋透過滑板去展現自己特別之處。
＃如果沒接觸滑板，能想像自己是怎樣？
我想像到會係個廢人，以前做任何事都好三分鐘熱度，淨係鍾意踢波，所以啊媽唔會第一時間買滑板畀我，但後來不知不覺沉迷咗，每日放學就去踩，喺屋企就睇滑板片，任何時侯做嘅事都係關於滑板嘅。正因為踩滑板成就咗依家嘅俊仔，佢擴闊咗我個世界，認識咗唔同範疇嘅朋友，亦都見識咗好多。如果當初無踩嘅話，我的生活一定會很普通，佢絕對算係救咗我一命。
＃你認為 SKATER 必需擁有的條件又是什麼？
要勇於嘗試，走出第一步，如果只做自己做到嘅事唔肯試新嘢就唔會有突破。
＃可分享自己最喜歡的滑板穿搭或品牌嗎？
黑白色為主，鞋就都係 VANS，依家着緊嘅 VANS SKATE CLASSICS SLIP-ON，好嘅科技令踩板會更舒服，另外都鍾意 FUCKING AWESOME。
＃滑板能給你一種 “ESCAPE” 的感覺嗎？
俊仔：滑板係我嘅精神食糧，有時做嘢攰，踩滑板就可以唔駛諗任何嘢。
＃有關滑板的短期目標？
希望可以以滑板愛好者嘅身份繼續推廣滑板，等唔同人都可以認識呢項運動，一齊試一齊玩。
＃疫情過後希望去哪個國家嘗試踩板嗎？
美國滑板文化最深厚，通俗啲講，幾乎算係國技，所以好想去美國。
KB
「我細個嗰時成日諗，唔知自己大個之後係咪會着「大人衫」，但原來係唔會，我都仲係一樣咁着。」人稱 KB 嘅 KEVIN BOY 李健宏自小澳洲長大，當時喜歡以滑板代步，雖然 KB 踩板僅短短幾年，但之後他一直非常沉迷街頭文化，再接觸到音樂、藝術，現在更所為人知的，應該是 LMF 和 HARDPACK 鼓手這個身份。一切該由滑板說起。喜歡流連北海道二世古的 KB 帶起圈中滑雪熱潮，疫情之下無法出遊，一心為了「止板癮」而重拾滑板這個興趣，反而令 KB 重新審視自己的「起點」。訪問當日 KB 穿着一貫街頭造型，但隨之而來的是看起來非常笨重的保護裝備，完美示範了滑板場上，那些安全指引的裝束。
「四十幾歲人，踩板唔駛太型嘅，安全就得喇！」KB始終擔心傷患會影響打鼓，影響同事，訪問中途的一陣驟雨灑濕了板場，KB 也自動自覺收起滑板。另外近年 KB 創立了 THE BADDIES FACTORY ，深明紋身的年輕板仔板女在職場上的難處，旨為他們提供機會，幫助他們走進行業。重拾滑板的 KB 沒有穿起當年想像的「大人衫」，但卻多了幾塊護肘，參與滑板的崗位亦有所不同。雖說不敢踩，驟雨過後，KB拿起滑板，於涼亭下反覆練習同一招 OLLIE。
在 Instagram 查看這則貼文
/ HELLO 大家好！我係一個職業嘅鼓手，亦都係一位非常坎坷嘅 YOUTUBER，哈哈！其實我係一個多功能打雜，KB！/
# 你們是什麼時候開始玩板？又是為什麼開始接觸？
我就1987年開始有第一塊滑板，踩到1990年就鐘意咗打籃球，冇再踩，又迷上咗 MICHAEL JORDAN，但我依然都好投入喺滑板呢個文化入面。
＃可以為我們介紹一下踩街同板場又有什麼分別？
以前細個喺澳洲就踩街多，因為澳洲有個優勢，路會順點，凹凸較少，以前都是代步比較多，細個踩去火車站，喺火車站踩出 CITY，已經係87年的事了。
＃原來你小時侯玩過了！那為什麼現在重拾興趣？
其實係我沉迷咗 SNOWBOARD，之後先想踩返板，特別係疫情期間，好多人因染病過身，我就覺得生命好短暫，自己重有咩想做而未做，我就想 PICK UP 踩板，以前有籍口，怕忙、怕傷，但就因為疫情我哋再無籍口，就約埋幾條中坑一齊搵吓俊仔學返。
＃可以介紹一下你的個人品牌 THE BADDIES 嗎？創立它們的原因是什麼？
THE BADDIES 係由 2014 開始，唔係賣滑板而係賣衫的，因為自己很喜歡一啲 MESSAGE TEE，但又揾唔到鐘意嘅 “MESSAGE”，就覺得不如自己做。另外 BADDIES 呢個品牌都同樣喺海外開咗酒吧同滑雪學校，返到香港就搞咗個「THE BADDIES PRODUCTION」，壞人製作中心，就係回歸初心去拍 YOUTUBE，希望可以娛樂大家，到今次就成立 THE BADDIES FACTORY，簽咗一班踩板、紋身嘅年輕人，希望可以帶多啲機會畀佢哋，輕輕推佢哋一把，其實我好開心可以吸納到呢班我好欣賞嘅年輕人。
# 滑板能給你快樂的原因是什麼？
呢個文化最正嘅係無論踩得叻唔叻，厲害嘅 SKATER 亦唔會因為你唔夠勁而唔同你玩，反而會互相幫助，我鐘意呢個 VIBE，成個氣氛同能量係好好嘅，唔同其他運動咁強得失心。“ THE BEST SKATER IN THE WORLD IS THE ONE WHO HAVING THE MOST FUN ON THAT DAY ” 玩得開心就勁㗎喇！
＃有沒有關於滑板的難忘經歷？
跌親手。如果重係細時就無咩問題，但依家就會好大問題，例如之前整到手，睇好多醫生都發唔到力，連出 SHOW 夾 BAND 的成員 JOEY TANG 都叫我唔好玩住，所以我都停咗段時間。
＃如果沒接觸滑板，能想像自己是怎樣？
如果返到 1987 年自己無接觸滑板，我可能唔會接觸到咁多呢個文化，無論衣着、音樂、藝術，因為我是開始踩板，睇滑板相關的事，先會變成依家咁樣，我細個時成日諗，唔知自己大個之後係咪會着「大人衫」，但原來係唔會，我都仲係一樣咁着。其實是因為滑板這件事賦予人一種 LIFE STYLE，就算踩得唔叻，只要你投入呢個文化自然會學到好多事物，識到好多唔同嘅人。
＃作為一個 SKATER 必需擁有的條件又是什麼？
膽量，再老土一啲，就係跌低唔怕企返起身，跳出自己嘅框框。另外堅持都好重要，踩板唔係一個潮流，而係一個文化。
＃可分享自己最喜歡的滑板穿搭或品牌嗎？
我一定着長襪保護自己小腿，衫褲就鍾意 STUSSY，依家着緊嘅鞋係 VANS PRO KYLE WALKER，裡面好多 CUSHION 但又有腳感。
＃滑板能給你一種 “ESCAPE” 的感覺嗎？
星期日晚可一班朋友踩吓，可以離一離開現實世界，出一身汗見見朋友，開工要用好多腦，睇譜、記對白或者做主持，嚟到呢度踩板，就大家都係平等嘅，互相鼓勵大家，就算唔練嘢都可以玩下 CHILL 下。
＃疫情過後會希望去那個國家嘗試踩板嗎？
我貪心一啲，想去美國 SKATEPARK 同埋返去巴西聖保羅嘅板場。因為我之前去巴西拍攝踩滑板，喺嗰邊跌倒過好多次，我記得當時送過一塊板，畀一位爛咗板嘅巴西小朋友，我好想返去搵他，很想返去再 DROP IN 畀佢哋睇，話佢知，我呢位亞洲人哥哥技術已經進步咗少少！
RELATED ARTICLES:
Comments